D‘modifizéiert Gesetz vum 9ten Mee 2014 iwwert industriell Emissiounen, dat d'EU-Direktiv 2010/75 vum europäesche Parlament an dem europäeschen Rot vum 24ten November 2010 zu den industriellen Emissiounen transposéiert, ziilt op eng integréiert Preventioun an Reduktioun vun der Ëmweltverschmotzung duerch Betriber of.

Déi an deem Gesetz festgehale Reegelen zilen dorobber of

- d‘Ëmweltverschmotzung aus industriellen Aktivitéiten ze vermeiden oder ze reduzéieren,

- d’Belaaschtung vun Loft, Waasser an Buedem duerch Emissiounen ze vermeiden oder, wann dat net méiglech wär, ze reduzéieren,

- d‘Produktion vun Offall ze vermeiden

fir d‘Ëmwelt insgesamt op engem héijen Niveau ze schützen.

Déi vum Gesetz viséiert industriell Aktivitéiten sinn a verschidde Kategorien ënnerdeelt:

- Aktivitéiten aus der Annexe I (verschidden Zorten vun Aktivitéiten),

- Grouss Verbrennungsanlagen,

- Offallverbrennungsanlagen an Offallmattverbrennungsanlagen,

- Installatiounen an Aktivitéiten bei deenen organesch Léisungsmëttelen agesat ginn,

- Installatiounen an deenen Titandioxid produzéiert gëtt.

Eng Anlag kann ënner eng oder méi vun deene Kategorien falen.

A Lëtzebuerg hu mir iwwert 60 Anlagen déi ënnert dat Gesetz falen, ongeféier zwee Drëttel dovunner sinn Anlagen aus der Annexe I.